Work Heart Play Heart!

某日本通明星於關西旅遊節目揚言去大阪唔一定要食蟹道樂，並推介Kani- shigure。我們一於去試一試，睇吓是真還是假！ 我們shopping 到3pm 才上去食，入到餐廳見無乜人已有點懷疑，一開始食就確定中伏了！ 餐嘅價錢的而且確比蟹道樂平一㸃，但無論食物賣相、質素和味道都差一截，火！ 蟹棒刺身竟配三文魚，食到第二味已上火。 你睇，個鍋竟然係爛的，呢度係日本嗎？慶幸個鍋嘅湯底尚算鮮甜。 呢幾味嘅賣相同味道一致，超普通。。 當侍應放低呢份野嘅時候，真係唔知做咩，想點呀？ 原來要自己動手做Risotto，講真食到呢度，已經勁失望，仲要自己動手？ 唔單止食物質素低，呢度嘅服務亦係0分，因為侍應永遠係黑面。幾千Yen一位嘅價錢食呢啲質素，仲要受氣，真係想喊！由於時間關係，此行唔可以再安排時間食蟹道樂！深深不忿嘅情況下，當晚立即係facebook同朋友仔分享，竟然有好多知音人，各位小心睇路！ 旅遊日期：2017年1月

去日本食鐵板燒是常識吧！日本通 Dicky San 極力推介 Miyachiku 宮崎牛鐵板燒，無理由唔試！ Miyachiku 大阪分店設於心齋橋旁，絕對方便shopping 大過天嘅香港人。我們沒有訂位，行到兩㸃零先入去歎個豐富午餐補充腳骨力。Miyachiku 餐廳環境舒服，兩個人已經可以有個私家位同鐵板燒枱。有禮侍應送嚟餐牌，才知原來兩㸃後無午餐供應，well 出嚟玩預佐要洗錢，我們叫了兩客100g 嘅宮崎牛，一於歎個豪午餐！ 廚師即場烤製的多士頭盤為呢餐鐵板燒揭開序幕。 有編號嘅宮崎牛出場了，敏感嘅野食佐先講！ 靚牛扒用牛油同香蒜一齊燒，睇到我囗水流，好香呀。。 放火是鐵板燒必經環節，雖然唔係第一次見，但仍然影得開心，旅行嘅心情永遠唔同！ 唔好睇少呢塊用嚟放住牛扒嘅麵包，一陣廚師會用嚟整甜品的。 牛扒燒得剛好，肉汁豐富且鬆化無比，正！ 餐廳準備了唔同嘅汁食牛，個人覺得簡單加片蒜和鹽已經超級好味了。 除了牛扒外，炒飯是不可少的。外表普通嘅炒飯味道非凡，色香味俱全！ 食完飯已經飽，但眼見廚師用心將一塊平平無奇嘅麵包製成甜品，無理由浪費他的心機。最後，我係暫時放低減肥嘅包袱，一啖不留！ 以呢個價錢有咁好嘅食物質素和環境，真係無得輸呢！ http://rest.miyachiku.jp/sp/osaka/index.html 旅遊日期：2017年1月

一月遊日，每天與時間競賽，目標是係最短嘅時間去最多嘅商店買 最多嘅 野。 然而，嚟陶然亭歎米芝蓮菜就 無得急，因為佢地慢工出細貨，由入門口一刻起就要調整步伐 ，行街嘅野明天請早。 陶然亭 係一間小店，坐位唔多，兩個廚師加一個侍應打點一齊。呢度全日文對話，慶幸 日本同事由介紹到訂位以致點菜 都 安排妥當， 我們只負責食同 比錢，否則就要揾 Google  翻譯大神出馬了！ 10000Y en 一位嘅菜式共有 9 道菜，雖然 款款 精緻，份量唔多， 但唔駛擔心，一定夠飽。 由於無法溝通，我唔太清楚食材， 9 道菜 有魚生、蒸點、湯、冷烏冬、飯及甜品 等， 各有特色，廚師用心製作，讚！ 魚生除了新鮮外， 廚師 加了些芝麻和海藻，將魚生卷著 芝麻和海藻 一齊食， 芝麻和海藻 的香味令魚生的 味道 更出色 ！ 加了梅子的蒸魚看似平平無奇，但十分開胃好味，得！ 這味配有豆腐醬的蔬菜感覺很特別，但味道一般。 這是 冷烏冬 ，混合所有配料後，令滑滑的烏冬更香更正，可否 encore  啦？ 這個湯鮮甜無比，正！ 魚仔飯加了少許配菜後，味道更濃郁，我平時唔愛飯都食清！ 呢餐我們靜靜地食佐3個鐘，食物款式和味道確實很好，如果上菜速度可以快番小小就完美了！ http://r.gnavi.co.jp/kb6r000/ 旅遊日期：2017年1月

櫻花期未能成功入住，一月京阪之旅終於可以入住呢間悠合了京都傳統建築特色，以及現代時尚設計於一身的酒店 — Hotel Kanra Kyoto。 我們的房間在別館（Annex Building)，別館的雙人房比本館的大。酒店靚女職員話本館較新，只翻新了差不多三個月，早知就揀新唔要大啦！ 雖然房間唔係新裝修，但仍保養得十分好。呢兩張床超大超舒服，瞓4-5個人都無問題，我們兩人一人瞓一張大床，極度寬敞舒適，正！ 房間空間感十足，且設有小客廳，一定夠位擺我啲戰利品，不錯不錯！ 洗手盆設於浴室外，最喜歡呢個雙面盆設計，方便！ 浴室分別設有企缸和浴缸，爽！ 廁所則設於浴室對面，與浴室分開，呢款設計最適合一家大細入住啊！ 早餐方面，餐廳提供西式和日式選擇。西早睇就好似好大份，不過每款食物都好精緻，唔算好飽肚。 若然要飽肚，可能揀日式會好啲，起碼有飯落肚啊！ 酒店距離京都JR駅約15分鐘路程，唔想行可以搭一個站地鐵，尚算方便。 我們係度住了兩晚，每晚房價連早餐約HK$2155，個人覺得可接受！ http://www.hotelkanra.jp/ 旅遊日期：2017年1月