Work Heart Play Heart!

由川越去入間市竟然遇上快速急行，令車程大大縮短，1個鐘唔駛就到達我最喜愛的入間市outlet。 原來每年4月底至5月初也是日本的黃金週，大部分商店也進行黃金週減價，outlet 當然唔例外啦！減價期間，outlet 仲特設加班巴士穿梭outlet及入間駅。以後除佐1、7月外，5月初又多個遊日的理由吧！ 旅遊當日Outlet 正進行減價，港人至愛Le Creuset 更設有特別勁減counter， 平到不得了，慶幸我尚未中毒，睇完又睇，但最終一件都無買到呢！ 平時行outlet，我們多數去food court 醫肚，但今次我們聽網友介紹試佐呢度唯一一間嘅迴轉壽司店。呢度可以用平、靚、正形容，絕對值得花少少買野時間嚟食番餐勁嘅！ 入間市outlet最正嘅地方係呢度主力係日本人行逛，可能outlet 位處較遠關係，呢度只有少部分香港人會嚟，而普通話人更買少見少，所以size 齊，款式亦多，最緊要係行得舒服。 提提你，遊客可到Information 攞份 Outlet Special Coupon，真係抵上加抵！ http://www.31op.com/iruma/tw/ 旅遊日期：2016年5月

東京最正係shopping 以外，仲有好多選擇，今次我們揀佐有小江戶之稱嘅川越，大愛！ 於池袋坐東武東上線去川越只需約35分鐘車程（急行），方便快捷。 若你來回池袋可考慮買 Kawagoe Day Pass，只需1000Yen包佐來回池袋與川越車票，以及無限次乘搭川越巡迴巴士。 巡迴巴士設於3號乘車月台，川越駅指示清楚，且放有地圖任你攞，自由人可以放心！ 我們坐到去菓子屋橫丁附近下車，一切由日本懷舊零食開始！ 呢度可以搵到好多燒菓子，好多日本人都手拿呢款長菓子，唔知係咪好好味呢？ 除菓子屋橫丁外，我們主力行蔵之街，行吓食吓，估唔到我們可以行佐差不多4個鐘，仲買佐唔少野，超開心！ 星期六嘅川越人山人海，但呢度99%都係日本人，人人守禮，多人都可以行得好舒服，正！ 旅遊當天，時之鐘正進行維修，無緣一暏呢個川越地標確實有點可惜，唔緊要，比個藉口自己下次再來吧！ 既然買得咁開心，一於唔好比佢停，我們直奔三井入間市outlet ！ 由川越到入間市outlet唔駛一小時，我們先到本川越駅乘搭西武新宿線，係所沢駅轉西武池袋線到入間市駅，然後再坐巴士直達，繼續買過痛快！ 下篇再續。。。 旅遊日期：2016年5月

4日3夜步走東京，方便是上策，我們一早訂了位於新宿歌舞伎町的Hotel Gracery。 2015年才開幕的Hotel Gracery以哥斯拉為賣點，酒店開業不久，已係Facebook 見到唔少以哥斯拉出沒於歌舞伎町為題嘅照片，呢隻哥斯拉已成為新宿新景點！ 雙人房間不算大，最特別係浴室、廁所及洗手盤自成一國，且呢3部分佔了房間約40%嘅地方，可能這是最新日系設計吧！ 其實，去東京其中一個重點當然係狂買，我寧願佢比多啲位我放行李囉！ 浴室備有浴缸及花灑選擇，這點為酒店加了不少分數！ 早餐方面，酒店提供兩個選擇，分別是日、西式自助餐，及三文治自助餐。 日、西式自助早餐位於酒店地下，款式較多，我們係度食佐兩個早上。 三文治自助早餐雖然款式較少，但餐廳環境較舒服，且可近距離欣賞哥斯拉！ 酒店位處歌舞伎町，極度方便，可能因為此原因，酒店吸引了很多講普通話嘅遊客居住！ 黃金週假期，酒店房價為HK$1,600連早餐，尚算可接受吧！ http://shinjuku.gracery.com/ 旅遊日期：2015年5月

一月份大阪購物之旅因酒店停電，最終未能成功入住呢間位於天王寺的新酒店，4月份京阪遊誓要一試Marriott 嘅質素，與Intercontinental 比拼一吓！ Marriott Osaka Miyako 位於天王寺駅旁，酒店大堂設於19樓，樓下是近鉄百貨（Kintetsu)，且鄰近Mio及Q's Mall 等shopping mall，購物絕對無難度。 跟Intercontinental Osaka 一樣，你唔會係度搵到傳統日本酒店一式一樣嘅浴室設計。酒店房間設計時尚，無敵景觀係酒店嘅最大賣點。晩上我們耳聽廣東歌，心神在享受五光十色的大阪景觀，正！ 酒店選用泰國品牌THANN嘅浴室用品，沐浴後房間散發著泰式香薰清香。 Marriott Osaka Miyako比開業兩年多的Intercontinental Osaka 新淨，雖然Intercontinental Osaka大部分房間都沒有無敵景觀，但Intercontinental Osaka 嘅房間更大，設計更舒適，去到Intercontinental Osaka，你一定會好有衝動嘆個浸浴呢！ 早餐方面Marriott Osaka Miyako亦輸一條街，無論在食物味道及食物選擇方面，Intercontinental Osaka 都較優勝。係Marriott Osaka Miyako比多幾百蚊食早餐，我們完全有被騙感覺！ 另外，我兩次住Intercontinental Osaka都可以被安排early check in，但Marriott Osaka Miyako 就點都要我們等到3pm，我唔相信間酒店咁full 囉！ Well! 正所謂唔試唔心息，總算是試過吧！若然價錢不是相差很遠，我們還是會選擇Intercontinental Osaka 呢！ 有關Intercontinental Osaka 嘅blog http://workheartplayheart.blogspot.hk/2015/01/blog-post_25.html?m=1 旅遊日期：2016年4月