Work Heart Play Heart!

邊爐精去到台北當然不停火鍋，雖然我愛辣，但嚟到無老鍋我更愛白湯。呢度嘅白湯以養顔美容為名，湯內配有原條人蔘，不油不膩，我飲完一羹又一羹，正！ 為方便食客，無老鍋會先奉上4枝湯底，我們可以隨時按自己需要自行加湯。 係香港每次食牛肉都會皮膚敏感，但嚟到台北，敏感竟然暫不探訪，牛肉無有怕！ 與馬辣相比，無老鍋嘅湯底一定無得輸，但呢個墨魚滑就似乎唔夠爽口彈牙，馬辣嘅手打花枝正啲喎！ 老油條永遠係麻辣湯嘅好朋友，就算白湯如何美味，油條始終同辣湯味道最夾！ 不得不提是我們發現附近啲台灣人都不斷添飯（飯是可隨意添加的），同我們淨食餸很不同，見他們食完一碗又再添一碗，我們忍不住又試了少少，原來呢度啲飯真係很好味呢！ 免費送來的沙冰不但解渴，仲幫我降溫！ 呢餐有靚湯、海鮮、肉同菜都只係台幣1,490（即約港幣371.26），真係抵食到不得了！ 若果你愛人蔘，你必定要試一試無老鍋，若然你不能接受人蔘等藥材味，這一鍋會較適合你！ 有關這一鍋的介紹： http://workheartplayheart.blogspot.com/2015/03/blog-post.html 旅遊日期：2015年2月

每次路過此以明星作招徠的馬辣信義店都坐無虛席，無論晩上8㸃定黃昏5㸃，總之無訂位就唔駛諗。農曆大年初一係酒店check in後已差不多下午2點，反正順路便走上去碰碰運氣，竟然有位，終於有機會一試呢間紅店！ 假期收費台幣635（約港幣163）一位，包湯底、食物、飲品同甜品，總之任食任飲兩小時，未食大概已明白點解咁旺場。 客人可任選兩款湯底，我們揀了麻辣同膠原蛋白鍋，麻辣湯辣味十足，嗜辣者必定大愛，但個膠原湯底就無咩特別，只是稍為比滾水好一㸃。 食物方面選擇眾多，包括肉類、海鮮、菜及菇類等達70多款，基本上比無老鍋或這一鍋的選擇還要多，我們揀得好開心呢！ 咪以為他們將貨就價，呢度啲食物質素相當唔錯，帶子鮮甜、紐西蘭牛肉好味、牛百頁無漂白、手打蝦丸混有大隻鮮蝦，手打花枝又爽囗，惟每次送來份量不多，我們要不停encore 再encore。 飲品方面，除汽水外，價錢亦包佐啤酒同紅、白酒，連花茶都有，真係多元化到無得輸！ 雪糕必定是麻辣火鍋嘅最佳拍檔，但無諗過係呢度嘅雪糕竟然係高檔嘅 Movenpick 同Haagen-Dazs！真係食完兩個鐘，包你可回本呢！ 馬辣確實係平、靚、正嘅任飲任食火鍋之選，唔怪得經常爆滿，推介！ 旅遊日期：2015年2月

Line Friends 大熱，繼首爾店後，亦於2014年10月底在台北開了全球第2間分店，新店位於市政府站Breeze 微風松高店3樓。雖然我唔係fans，但都去湊湊熱鬧，同熊大say hello！ 店內有唔少影相位比fans拍照，可愛嘅Line Friends 絶對可以幫fans 係facebook 同Instagram 呃唔少like呢！ 店內有唔少可愛精品及用品， 連首飾都有得賣， 農曆新年期間更推出優惠，我亦唔執輸買佐兩大袋。 唔單止店內，店外佈置亦一啲都唔簡單，微風商場外竟然可以發現熊大向街上途人打招呼，很可愛啊！ 有Line Friends 助陣，令2014年10月才開幕的微風松高店新色不少！ 旅遊日期：2015年2月

L'ATELIER de Joel Robuchon 於台北信義區也設有分店，作為Fans當然要去朝聖，看看呢間操普通話的法國料理有咩唔同！ 餐廳位於市政府站旁的BELLAVITA內，餐廳繼續走紅黑色調，並續以開放式廚房為賣點。從現場觀察所見，似乎台灣人唔太喜歡坐開放式廚房外的bar 枱，同樣Concierge 訂枱時亦替我們要求了坐梳化枱。 侍應先給我們介紹晚餐選擇，呢度嘅晚餐有兩款選擇，台幣2,280 (約港幣585)可揀兩款頭盤、一款主菜及一款甜品，而台幣2,880（約港幣738）嘅晩餐則可揀多一款主菜，絕對超值！ 照例餐廳先送來一杯帶鵝肝味的泡沫狀頭盤，呢個免費頭盤我還是最掛念巴黎的味道！ 呢味薄如紙的sea bream，味道不錯，不過食完好似無食過咁。 既是Robuchon 出品，賣相自然講究。我第一次食賣相如此特別的沙律，惟味道普通，有點失望呢！ 啲頭盤如此精細，起初還擔心他們將貨就價，當上第一道主菜時，所有擔心一掃而空！呢味sea bass主菜，魚肉嫩滑，連平時不愛吃魚的我也可以KO了一整塊。 烤鴨和烤雞味道都同樣頂瓜瓜，絶無令人失望，似乎主菜比頭盤更出色！ 當然法式甜品亦永無失威，雖然已經好飽，但一於食埋先減吧！ 呢餐盛惠台幣6,732（約港幣1,726），係我們此行最貴嘅一餐，但呢個價錢加呢個份量係香港一定食唔到！ 旅遊日期：2015年2月

咖啡店在台北極速冒起，連電影亦以咖啡店招徠，沒有「等一個人咖啡」的名氣，聽見幸福musikaffee cafe 卻以另一種方式突圍！ 農曆年的誠品松菸店塞滿了人，慶幸呢到沒有拖喼黨，縱然人多仍然可以慢慢行慢慢睇。當途經2樓時，眼球被動聽的音樂聲吸引住，當初還以為只是一間音樂盒店而已，睇真啲原來裏面有咖啡飲，便隨住啲音樂聲入去嘆杯咖啡，讓腦袋放空！ 當店員送來咖啡時，我深深被呢個setting吸引住，除了咖啡和曲奇外，究竟個木盒有咩用呢？ 一打開木盒，悅耳的  Canon in D  音樂聲隨即在空中舞動，音樂永遠係最好的治療師，能聽見確實幸福！ 除了咖啡外，我們還㸃了一件咖哩雞批，雞批即叫即焗，賣相與香港吃的不同，但呢件批超好味，批底十分香脆，正！ 放空佐唔夠一小時，我決定將個Canon in D 音樂盒帶番屋企。書本音樂盒有大本及細本選擇，細本價錢約台幣2,000即約港幣510，價錢一啲都唔平，不過正所謂千金難買心頭愛，我還是俾了錢免得返到香港後悔呢！ 因為音樂聲而飲咖啡，因為飲咖啡而加多件餅，最後因為盛載咖啡嘅盆而買多個音樂盒，他們呢種交义銷售方式來得自然舒服，確實值得一讚！ 旅遊日期：2015年2月