Work Heart Play Heart!

開業於2013年12月27日，HumbleHouse Taipei 寒舍艾麗酒店內匯集世界各地的經典藝術作品，可以話集藝術、優雅與型格於一身，酒店鄰近捷運市政府站，贏盡地利！ 雖然我唔識欣賞藝術，但呢到有唔少擺設都好有氣質，型！ 我們由大年初一住到初四，足足係到瞓足3晩，唔係講笑我們覺得呢度張床仲好瞓過屋企嗰張，超舒服！ 房間內設有一張小型橙色梳化及一張長枱，夠晒位放戰利品啦！ 洗手間設有企缸和浴缸，不過浴缸較細只可坐住浸，洗手盤附近嘅空間亦較少，唔夠地方晒護膚品同化妝品添！ 從浴缸可以望透房間，雖然無咩特別用途，但呢款設計總會為房間加一㸃分數呢！ 美中不足係房間沒有特設地方放行李，我們唯有將其置於電視機下的空間位，雖然電視機與大床距離不算十分寬敞，但開喼後都尚算ok。 呢度早餐嘅款式多到不得了，除佐一般早餐選擇外，連Parma Ham都有，食足3天都唔會悶，讚！ 下次去台北，又有多一間酒店選擇啦！ http://humblehousehotels.com/zh-tw/ 旅遊日期：2015年2月

大年初一出發到台北感受一下別國羊年氣氛，此行除了喜氣羊羊外，櫻花亦已偷步盛放，台北你實在可愛！ 根據網上智慧，係台北睇櫻唔駛走到老遠嘅陽明山或淡水天元宮，市中心嘅中正紀念堂已經可以比你影到夠！印象中我大大話話都已經去過中正紀念堂3、4次，每次重㸃都係睇、影或錄換兵儀式，行完嗰幾十級樓梯後都已經謝佐一半，從來無留意過中正紀念堂的公園及庭園！今次為佐追櫻，一於重點遊走公園。 係烈日當空下，要行晒包圍住 中正紀念堂嘅公園絶不簡單，但櫻花配藍天確實美，曬就曬吧！連iphone 也可影到靚相呢！ 二月中下旬，中正紀念堂嘅櫻花已開得很靚，呢度以山櫻花為主，深粉紅色的山櫻花為綠悠悠的公園生色不少，部iPhone 忙到沒有一刻可以停下來！ 除山櫻花外，園內亦種有吉野櫻，混合了深與淺粉紅色的吉野櫻，顏色比山櫻花更豐富！ 一個地方，同時滿足你兩個不同的櫻花夢，或許你平日只會因收玫瑰花而興奮，嚟到呢度保證你會為櫻花而瘋狂！ 台北櫻花期一般由2月上旬開始到3月底，每個景點的花期略有不同，出發前記得上網查清楚，免得撲空啊！ http://flowers.taipei/Sakura/ 旅遊日期：2015年2月

人生好多第一次通常都係發生於年少時候，估唔到幾十歲人才來第一次，既然係work heart play heart，也嚟個work hard分享吧！ 2014年12月因工作關係發生了一連串的第一次，婚後第一次沒有老公在旁飛歐洲、第一次係希斯路轉機，第一次去瑞士。。。實不相瞞，沒有一個任駛唔嬲嘅人相伴飛行，對於一個港女嚟講實在唔簡單！試想想一個女仔要係機場條行李輸送帶內優雅地執番件28寸喼出嚟，又或者係歐洲地鐵儀態萬千地攞住個28寸喼上落樓梯絕不是一件易事！然而為著份工作，我無條件地獻出呢D第一次，頂梗上！ 面對不能預計嘅未來，有人好有計劃，有人隨遇而安，無論你係前者定後者，總有幾分顫顫驚驚！雖然未至於瞓唔著，但我肯定有D未出發先擔心嘅情況，當無咩可以靠嘅時候，我唯有盡力祈禱，自問不是聽話教徒，但經驗話比我知只要我肯祈上面嗰個一定聽。出發前的主日崇拜，傳道人分享神總有預備，叫我們勇敢D，嘩！呢句說話簡直click 到我不得了！最後，瑞士之旅一切安然經過，亦感恩有幸出席，得到嘅比付出嘅多，從經濟學嘅角度嚟睇，此行絕對超值！ 無論正處於高處或低處，但神總有預備，放手吧，有信心地踏出第一步，迎接不同的眼界。祝願各位羊年有好多極開心嘅第一次！ 旅遊日期：2014年12月

人生第一次到達蘇黎世機場竟然不是因為旅遊，而是為工作！臨行前同事比佐間餐廳名我，叮囑我一定要去試試，當我諗住搵Google Map幫手時，此行攪手兼負責人話帶我們出去試試地道菜見識吓，最後發現原來都係同一間餐廳 - Zeughauskeller。 Zeughauster 餐廳所在地前身是軍械庫，建於1487年，歷史悠久。 攪手兼負責人話如果唔預先訂位，分分鐘無得食，估唔到瑞士D人咁貴都搵食困難，究竟瑞士人的錢從那裡來呢？ 亞洲人最愛分享，來自香港及日本的代表決定齊齊試呢度較特別嘅菜色： 這個是餐牌寫住必試蘇黎世菜式， 牛肉片同蘑菇片 用白酒忌廉汁煮成，再配一塊大薯餅。老實講，個人覺得個汁普通得嚟略過鹹，反而我薯餅就有㸃驚喜。然而，當你可以係麥記食到一塊不錯嘅薯餅時，你自然會對一份CHF34.5（約港幣290）嘅食物要求高一㸃！ 來自英國嘅代表推介呢個Mayor's sword，劍？呢把寶劍其實係牛肉，當侍應來劍時，大吸眼球，人人盼盼要求同侍應及寶劍合照！ 咁好玩又好唔好食呢？個人覺得牛肉煮得太熟，一般般啦！不過呢把寶劍要成CHF79（港幣656），呢個價錢配呢個質素就相當普通了！ 最後我們還㸃了甜品，可能外國人煮甜品總有一手，呢兩個甜品味道不錯，加分！ 雖然呢度食物質素不太如意，但我們食得很開心，原因是不同地方嘅代表係毫無壓力下傾談得十分愉快！有趣的是原來外國人對中文和普通話都很有興趣，而我亦發現只有香港人才喜歡相機先食，咁究竟他們在facebook 放咩呢？ www.zeughauskeller.ch 旅遊日期：2014年12月

初次踏足瑞士，當然要試試地道芝士火鍋（Cheese Fondue），感受吓瑞士的傳統「芝」味！ 正所謂人生路不熟，上網看罷食評，已立即訂位，怎料全部爆滿，心想唔係掛，何解12月初的蘇黎世咁難搵食？我們唯有行 Plan B，實行早D去食！ 我們係尼達道夫街（Niederdorfstrass）行了一陣聖誕市場，便於 黃昏6點零 走進Swiss Chuchi 碰碰運氣。有禮女侍應開出7點半還枱條件，我們諗到唔諗一口應承！坐下時，個男侍應話我們今晚超幸運，因為佢地全晩爆滿！嘩！乜原來蘇黎世真係咁難搵食，感恩我們 Plan B 計劃成功！ 坐低一望差不多枱枱都食Fondue 同烤肉，我們決不執輸，照跟！ 同枱整餅高手話地道瑞士火鍋一般酒味太濃，香港人未必喜歡，於是我們落單時要求Fondue減酒，果然減酒後的芝士火鍋超級好味，芝士香濃且帶有少少酒香，得！連平時因怕肥而少吃芝士的我亦吃過不停，一於食埋先算！ 起初見到呢個烤肉拼盤平平無奇，心覺不妙，怎料三款肉類（包括 牛肉、雞肉和豬肉） 都味道出色，唔通無添加嘅歐洲豬、雞及牛真係份外好味？ 不得不推介這個烤芝士，侍應教我們先將整片芝士放入烤爐內烤至半溶，然後再放在微暖的薯仔上一齊食，呢個組合簡直係最好味嘅增肥拍檔！ 除了全枱高脂食物外，我們亦有order 沙津，當然相比起芝士火鍋、烤芝士薯仔同烤肉，個沙津味道相對普通了一㸃。 最後我們還㸃了甜品，靚女侍應推介嘅呢個 Toblerone parfait 超得，朱古力味道恰到好處，不會太甜，我們很快就KO一整碟！ 埋單盛惠CHF112.5即HK$1,000唔駛連3杯紅酒，個人覺得好抵，話晒瑞士D野超貴呢！ Swiss Chuchi位於Hotel Adler內，鄰近跳蚤市場，十分易搵，值得一試！ www.swiss-chuchi.ch 旅遊日期：2014年12月