只要你係Facebook 有like 過任何一個有關Japan嘅fans page,都一定會經常見到白川鄕不同季節嘅風景相,今次我們一於親身去欣賞呢個網絡熱爆嘅地方,乘機影相打卡扼 like ! 我們由高山揸車去白川鄉,車程只需約一小時。沿途差不多3/4路程都係行隧道,沒有山路,十分舒適安全。請留意隧道是要收費的,如果租車沒有ETC就需揀「一般」收費亭停下繳費,入隧道前亦需先取高速道路通行證,離開晒所需隧道後才需付費。由高山去白川鄉的隧道收費係1,220Yen,大家可考慮租借埋ETC,因用ETC付款是有折扣的! 嚟到白川鄕,我們先把車泊低,便開始行程了!白川鄕設有不少收費停車場,泊全日都只需500Yen(以現時𠥔率計算,即約HK$35唔駛),日本人確實有良心,如此受歡迎嘅地方就算收貴啲,都應該大把人泊啦! 白川鄉內指示清楚,而停車場內更放有地圖,自由行一定無問題,放心吧! 重點行程當然係去展望台影白川鄉全景,旅遊書教可以搭巴士上去,但我們選擇佐行路,趁仲行得,一於做吓運動,享受神給我們的恩典之餘,仲可以呼吸一吓大自然清新嘅空氣呢!徒步行上展望台約需15-20分鐘,以行斜路為主,雖然部分斜路接近40度,但道路寬敞尚算好行。唔係講笑,我們沿途見到唔少日本女仕著住高跟鞋行上去,真係唔簡單! 從展望台望到的白川鄉確實頂瓜瓜,10月19日雖然紅葉尚未全盛放,但此時的白川鄉已相當迷人,相比雪下的冷傲,此時的白川鄉顯得更有活力,相機忙到不得了! 除了展望台,記得去行埋條安全到不得了嘅吊橋,橋下的流水配上紅、橙、黃及綠的樹葉簡直靚絕! 除了影相外,白川鄕亦有不少個性小商店,提提你部分商品相比高山古街出售的可能略貴50-100 Yen,揀些白川鄕限定就放心吧! 我們亦在此品嚐了午餐,呢間小店鄰近吊橋,店內坐位不多,但卻客似雲來,1,500Yen已可品嚐飛驒牛朴葉燒定食,雖然牛肉未到入口即溶嘅質素,但仍非常好味! 個人覺得白川鄉嘅美雖然未及歐洲嘅自然美境,但以3個零小時嘅機程,呢度絕對係繁忙香港人行開吓嘅好地方! 旅遊日期:2015年10月 #白川鄉 #Japan