Work Heart Play Heart!

莫斯科 - 世界十大最富有城市，亦曾被評為十大治安最差城市之一。咁自由行會唔會好危險？ 金融才俊兼恒記明日之星米高數月前從俄國回來，係facebook見到佢D靚相令人羨慕不已！明日之星今次原來係自由行，wow! 果然夠膽量！唔理佢幾忙，我鍥而不捨地問過明白。 原來90%俄羅斯人都唔識講英文，而且大部分地方都只印有俄文，明日之星話只可用書同手溝通，仲話遊莫斯科交通方便且絕對安全，自由行問題不大！ 莫斯科的美由每日最多人流的地方 - 地鐵開始。 莫斯科地鐵公認為全球最美麗的地鐵，地鐵於1935年開始營運，時至今日已有12條缐186個站，四通八達。每個站的設計均各具特色，直至現在未有一個站的設計是相同。 富麗𤎌煌的吊燈及高貴大方的大理石柱是莫斯科地鐵的特色！ 在莫斯科地鐵無論你要去多遠，每程均價28 盧布。如果你有時間，真係可以遊一轉地鐵河，睇睇呢個地下藝術館有多吸引！ 執筆之時俄國正發生克里米亞事件，如果唔係真係好想立刻計劃莫斯科遊呢！ 旅遊日期：2013年7月

1月東京之旅掙扎了很久究竟去唔去入間市三井outlet，原因係我們已打算拜訪位於東京木更津的新三井outlet，無理由一個行程去兩次三井的，況且入間市路程較遠，新宿來回差不多要兩個多小時車程！ 結果係去完木更津後決定要再戰入間，因為木更津實在未能令我們買得盡興（詳情請查看東京新outlet @ 木更津一文）！ 單以Nike為例，入間outlet提供大量期間限定特價款式，當然亦有唔少新款鞋！我的另一半終於係度買到心水球鞋，仲即時棄舊著新！這是他堅持要嚟入間的其中一個主要原因。 入間市outlet設有兩層，上層以日本品牌和運動品牌和主，下層則以國際品牌為主。部分商店在木更津outlet亦可揾到，不過呢度D款式較新，選擇亦較多，慶幸我們最終亦來了！ 交通方面，自由人可於池袋乘西武池袋缐到入間，再轉乘巴士。入間站有清楚指示，不會有問題的！ www.31op.com/iruma/ 其他相關文章: 1）東京新outlet @ 木更津 http://workheartplayheart.blogspot.com/2014/01/outlet.html 2）關東必去入間市outlet http://workheartplayheart.blogspot.com/2013/11/outlet.html 旅遊日期：2014年1月

數年前的英倫遊差不多成一個月前先確實行程，無論機票定火車都要捱貴票！交過學費自然會學精，所以我依家通常都會好早揾travel agent hold定機票，先再留意有無優惠，以防臨急價升！不過我發現依家個個都勁早hold機票，3月睇7月CX倫敦嘅機票已經好爆，慶幸我1月尾已經hold佐，不過本來想改早少少出發，依家就無行了，唯有按原定計劃行事。 歐洲火車票唔可以晨早hold定，只接受180日前網上購票，而且要即時確實並付款。今次4月中義大利遊未到3月已經定佐行程，3月2日上網買4月15日羅馬去佛羅倫斯同4月17日佛羅倫斯去米蘭火車票，Best First Class價錢分別係HK$475同HK$446一位。First Class坐位較Second Class寬敞且包飲品一杯，個半小時車程，個人覺得坐咩class都無所謂，不過訂票之時適逢First Class做緊優惠，價錢跟Second Class差不多，咁當然揀First Class。不過請留意呢個價錢係唔可以更改時間的，即如果錯過佐班次就閣下自理了！   訂票後兩星期抱住八卦嘅心情再上網check吓價錢，同一時間由羅馬去佛 羅倫斯嘅Best First Class已售罄，而坐低一個class即Premium Class都要HK$481一位，而由佛羅倫斯去米蘭火車票的Best First Class價錢已升至HK$610一位。嘩！呢D early bird優惠真係差好遠！我深信如果我可以2月訂票，價錢應可以再吸引D呢！ 各位早鳥確實有著數，下次唔好再問我㸃解要咁早plan，我深信有計劃的人總可享有較多優勢的！   www.raileurope.hk www.eurostar.com/uk-en

墨爾本之行shopping欠奉總是心有不甘，在免費給遊客坐的電車（City Circle)上發現outlet & specialty shopping 嘅單張，個心再次充滿希望，必要臨時加插此行程不可！ Harbour Town outlet位於Waterfront City/ Harbour Town電車站旁，坐免費City Circle可直達，非常方便。去到outlet，我們第一時間走去Tourism Lounge攞張免費Tourism Club Card，憑卡可享額外折扣。 期望越高往往失望越大，我呢個行街精對墨爾本徹徹底底的投降！呢個所謂outlet第一欠缺國際品牌店，第二商舖少，難道他們對outlet嘅認識真係咁膚淺？ 既然無咩可shop，唯有化悲憤為食量，係Harbour Town內一間餐廳坐低食野！張Tourism Club Card連係餐廳食野都可以享折扣優惠，算是心理上感覺好一㸃吧！ 究竟墨爾本人係邊度買衫的呢？ 旅遊日期：2013年12月

呢期興去台中，5月新娘Y同事誓要結婚前與女友人過人生最後一個無簧管嘅自由行，趁機飛台中享受人生！ 青春確是大本錢，5月新娘係台中雖吃過不停，但苗條依然！準新娘子誠意推介宮原眼科。眼科？做咩無端端去台中睇眼科？ 呢個眼科醫院由宮原武熊醫生於日據時代開設，台灣光復後改為台中市衞生大樓，後來受921大地震摧殘，嚴重損毀，至2010年由台中風梨酥名店日出購入建築，並重新包裝，外觀保留部分主要元素，老屋命運再次改寫，現為賣雪糕、珍珠奶茶及手信的地方！ 雪糕口味選擇多，兩球雪糕售150台幣，加餅底只需多20台幣，而且免費加3款topping。準新娘子話就算肥都一定要食！ 另外手信和喜餅禮盒都靚到不得了，淨係睇相都流晒口水了！ 此保育方法不但可保留歷史文化，加強旅遊景點特色，亦可發展商機，確是聰明絕頂，值得香港持政人參考呢！ 旅遊日期：2014年3月

每次搭飛機返到香港都最少等半個鐘至45分鐘先可以成功攞返件行李，試過一次唔知係咩問題我足足等佐成個鐘先見到自己個喼！似乎香港國際機場除了飛機跑道唔夠外，還急需檢討一下物流安排，免得留下一個壞印象給旅客！ 成功等到行李後，除佐要睇清楚係咪真係屬於自己外，請記得check 一 check個喼有無問題！我就試過個喼裂佐，條裂痕係個喼嘅右上角轉彎位，雖然未致會即刻爆喼，但一定唔可以再用。 此時此境如何是好？我地立刻攞個喼去行李詢問處，他們查詢所乘航班資料後，便檢查行李喼情況。謙謙有禮嘅職員告訴我呢個情況無得維修，繼而問我個喼買佐幾錢同用佐幾耐。我老實吿知個喼已經用佐5、6年，當時售價約HK$800。職員記低個喼嘅牌子後，係電腦睇佐一陣，就話賠返HK$600比我地叫我地自己補少少錢買一個新的。實不相瞞，我當時覺得超抵，其實個喼用佐5、6年都諗住換個新，我 立刻答應啦！ 當我們簽妥接受有關安排的同意書後，聽到隨後有幾位師奶理直氣壯地同行李詢問處的職員講，她們的行李喼值HK$3,000 - HK$4,000。我望一望他們的行李喼，心想唔係化？再望一望職員，他們一言不發，冷靜地專心check電腦，究竟係專業還是見慣不怪呢？我無繼續湊熱鬧，簽完名走人！ 成個程序唔駛10分鐘，既唔駛填表格，又唔駛影相，十分方便，好過claims 保險呢！

冬天在新宿血拼後，最好來個熱騰騰的火鍋或燒烤暖身！戰鬥完0101幾個館後雖然只係黃昏6時，但肚皮已經開始打鼓，站在冷冰冰的新宿街頭，我們極速走上在伊勢丹對面building的丑家炭火燒肉！可能時間尚早，日本人還未放工，唔駛等位。WOW! 裏面原來有唔少日本年青人已經食緊，佢地究竟係食下午茶還是晚飯呢？ 既然咁肚餓，一於齊齊放題，樣樣試吓先！放題每位4,980円，即約HK$375，除了肉外，還有海鮮、小吃、麵飯和甜品等選擇，尚算經濟！如果你係飲得之人，仲可以加1,500円任飲。計一計數，應該飲3杯以上就可以回本。 燒肉嘅好朋友我一定揀啤酒，清熱啊！ 呢度最唔方便嘅地方係只有一位員工識講英文，我地就算做埋動作佢地都唔係好明！ 呢碟牛係最好味架！雖然佢地唔識聽英文，我地又唔識講日文，但一開始他們已自動送來呢碟最正嘅牛！哈哈！不錯不錯！我們指住呢碟牛encore 再encore! 這是牛肉拼盤，我們很快就KO一整碟！好味！ D生菜很新鮮，用嚟包住D肉一齊食，無咁熱氣呢！ 這個豬味道也很好，我們都吃了兩碟。 海鮮拼盤，魷魚和蝦都鮮甜好味，惟帶子就一般！ 見到隔離枱燒佐好多條香腸，我地都order一碟食吓先！ 這個韓式煎薄餅，煎得十分香囗，正！ 現場所見呢度差不多全部都係日本人，旅客較少！日本人的口味都幾特別，他們十分喜歡吃內臓，encore再encore。由於唔識睇日文關係，唔小心order佐內臟就立即耍手兼擰頭，叫他們取走！ 臨走時見到收銀櫃枱旁貼了很多簽名呢！亂打亂撞下竟然都比我地遇到一間好味炭火燒肉，感恩啊！ 我們食到十分滿足，帶著火熱的身軀及陣陣燒肉餘香繼續血拼新宿！ 旅遊日期：2014年1月

位於新宿的Comme Ca Store旗艦店向來是香港人入貨的其中一個熱㸃，除了女裝、男裝和童裝外，旗艦店內還可以揾到雜貨和 嬰兒服裝，應有盡有！每次去日本，嚟Comme Ca Store朝聖定必是行程之一。我愛其品牌出品不但質量高且價錢大眾化。數年前，Comme Ca曾在香港設店，可惜價格定位偏高（貴過日本超多），最終全軍撒退！哈哈！香港人嘅錢唔易賺的！ 每次去Comme Ca Store血拼完女裝和男裝便走人。此行因肚皮打鼓，所以血拼後走上5樓的Cafe Comme Ca嘆個茶食件cake！Cafe裝修連貫店內傳統繼續走神秘路線，在昏暗的環境下食cake，感覺雖浪漫但又極度眼瞓， 可能因太努力血拼而超累吧！ Cafe 的蛋糕賣相精美，人見人愛，㨂佐一陣先可以決定order邊款！蛋糕幼滑好味，最重要係唔太甜，唔駛幾分鐘已經可以KO晒！ 我平時唔太喜歡品茶，但呢度杯特制生果茶簡直令我驚喜萬分，紅茶滲入生果的清香感覺清新，齒頰留香！正！ 下次嚟新宿，必定會再encore！ 旅遊日期：2014年1月