Work Heart Play Heart!

入住靚靚酒店，心情自然更正！始終瞓得舒適才可以有足夠體力遊山玩水及血拼，所以係酒店方面，我絕對唔會妥協！ 究竟點知邊間酒店啱心水？ 正所謂慳得一蚊得一蚊， 係邊訂酒店先最抵？以下係我個人嘅小小心得： Tripadvisor 係你好拍檔 Tripadvisor 確實係揀酒店最好嘅地方，大家千萬唔好只睇酒店網站， 尤其係歐洲地方，啲酒店歷史悠久， 啲相可能已經係好耐之前影，未必可信，去Tripadvisor 睇睇評價同其他旅客最新入住嘅相片就萬無一失！ 預早查定價格 Tripadvisor 仲有個方便係可以即時quote價，系統會顯示晒幾個主要訂房網站嘅價錢，例如 agoda.com、Booking.com，同 hotel.com 等。請切記要係tripadvisor 同其他訂房網站登記並提供電郵，然後 login入去查價錢。除非你覺得已好抵，否則唔好即時訂房，因為網站會按你所揀地方和酒店係一至兩星期內電郵優惠給你，例如early bird、折扣優惠又或是住3晚送1晩等！收到優惠後，再訂都未遲啊！ 除佐網上訂酒店外，我都會透過 travel agent 訂 package，因為好多時 package 價可能較抵！ 要做個精明消費者，記得早啲計劃旅程啊！

我們不是紐卡素fans，但每次歐遊總不少得陪我的球迷老公參觀球會。嚟到倫敦，當然唔少得去英超球會開眼界。上次已經去過香港人熱愛的曼聯和車路士，此行我們專程由Leeds坐火車去Newcastle，原因係為佐Newcastle United Private Stadium Tour。由紐卡素中央車站去球會只需約20-25分鐘路程，沿途指示清楚，非常易找！ 何謂Private Stadium Tour? Private Stadium Tour即只有我們兩人嘅tour，導遊1對2向我們講解， 唔似一般stadium tour 1對20-30人。而且 有問必答，仲可以不停影相，影到靚為止才走都無問題！ 參觀球隊嘅更衣室往往是stadium tour嘅一項有趣環節！有趣？因為導遊通常會同我們介紹作客球隊嘅更衣室跟主隊有何不同，例如作客球隊的更衣室較熱，淋浴設備較差及沒有幫助球員鬆弛肌肉設施等。我終於明白為何球隊作客一般相對會較難勝出，呢D環境策略可能已在球員的心理上幫助不少呢？ 這是作客球隊更衣室 這是紐卡素球隊的更衣室 影影吓導遊突然拿起老公喜歡球星的球衣，並給他即場著住影相，所以話英國人幾時都懂生意之道！ 除更衣室外，令一參觀重點應該係球會新聞發佈地方。Private stadium tour嘅好處係可以係最佳位置任影，你想坐Manager 嘅位置定係企新球員嘅位置影相都無問題，因為導遊絕對可以等你影夠先走！ 你也想經歷下球員列隊進場嘅感覺？Private Stadium Tour亦唔會令你失望，呢度仲會播埋進場音樂，讓你過足球員癮，正！ 除佐近睇球場外，紐卡素嘅Stadium Tour仲會帶你去到最高嘅坐位睇晒成個球場，嘩！好靚呀！ 最後球會安排我們在VIP廂房內享用午餐，一邊欣賞住球場美景，一邊嘆午餐，呢個體驗真係正到無朋友！ 如此難忘體驗盛惠GBP 65一個人，是否值得就見仁見智，不過個人感覺非常正！ 旅遊日期：2014年7月

每次去新地方自由行，都會先睇旅遊書了解當地熱門旅遊景點後，再上網睇旅遊blog，從別人的旅遊經驗中學習並計劃行程。今次我走了好幾間大書店都揾唔到阿姆斯特丹嘅旅遊書，唯有一切由Google開始，可惜互聯網對阿姆斯特丹的智慧亦不算多，究竟你心目中的阿姆斯特丹是一個怎樣的城市呢？ 沒有巴黎的優雅、也沒有義大利的歷史，更沒有倫敦的多姿多彩，阿姆斯特丹給我的感覺是一個多元化且新奇嘅城市。在阿姆斯特丹，你除了可以參觀博物館和藝術館外，你亦可以去紅燈區大開眼界，原來廚窗也是女性賣弄性感的好地方！還有呢？食大麻及同性婚姻在阿姆斯特丹亦是合法，你可以在街上見到各式各樣的大麻製品，彩虹旗餐廳或酒店隨街也是，確實新奇有趣！ 阿姆斯特丹不算大，由中央車站（Amsterdam Centraal）走到最遠嘅梵高博物館都只不過是約35分鐘路程，而且條路相當好行，沿路除了有唔少商店外，仲會經過運河，所以我們係阿姆斯特丹大部分時間都係步行，順便發掘此城市瘋狂的一面！ 如果你唔想行，亦可以踩單車，我想單車係阿姆斯特丹嘅主要交通工具呢！如果你唔想行，又唔想踩單車，你可以選擇搭tram。 你可以係Amsterdam Centraal 附近的Metro站內買票，車票分1小時、1日、2日、3日及4日，持票者可於指定時間內任坐metro或tram。至於tram的路線，大家可以係所住酒店索取一張地圖，他們的地圖會清楚顯示tram的路線。 雖然沒有旅遊書，但遊Amsterdam絕對無難度，而且由香港到Amsterdam不乏直航機，Amsterdam絕對可以係西歐遊的第一站！ 旅遊日期：2014年6月

嚟到倫敦當然要嘆番個英式afternoon tea啦，此行我們一共食佐兩餐。 第一餐係Selfridge地下Dolly's，味道雖不錯但還是普通了一㸃，呢D質素係香港大把！坐佐12個鐘飛機，無理由食餐普通野，所以我們再去The Chesterfield試佐afternoon tea。 The Chesterfield 係 Tea Guild Awards of Excellence 2013 的得獎酒店之一。呢度嘅afternoon tea簡直一試難忘，絕對係實至名歸！ 究竟有幾好？首先餐廳環境優雅舒服，係度嘆tea 簡直令人煩惱全消，人生一大樂事！ 友善到不得了嘅侍應同我們介紹呢度afternoon tea 嘅特色就係黃色呢罌蜜糖，佢話蜜糖是新鮮從蜂巢取出，加落scone、蛋糕同茶內都非常美味。我係微熱的scone上加少少蜜糖同奶油，簡直正到無朋友！ 除佐scone外，呢度嘅homemade sandwiches都非常得，麵包鬆軟兼餡料新鮮，好快就清佐成碟。 清佐碟三明治同scone後已經飽佐9成，此時 友善到不得了嘅侍應前來取意見，當佢知道我喜歡食scone後，再送來4件暖暖的，最後我連一件cake都無食，一共食佐4件scone，真係好滿足啊！ 貼心侍應還幫我們用一個好靚嘅盒包起餘下的蛋糕， 如此優質afternoon tea盛惠GBP 34.5一位，加稅及服務費後埋單GBP 77.62。雖然略貴，但個人覺得十分值得呢！ 嚟之前可以先於afternoontea.co.uk訂位，網站更會不時推出優惠，十分方便！ afternoontea.co.uk 旅遊日期：2014年7月

Art'otel Amsterdam 以設計特別掛帥，鄰近Amsterdam Central站，於tripadvisor 344間在 阿姆斯特丹的 酒店中排第26！事實上 阿姆斯特丹有唔少設計特別的酒店，但為佐方便搬行李，我們決定揀一間鄰近Amsterdam Central站的落腳地，故非此酒店莫屬！ 呢間5星級酒店於星期六或日晚入住價錢要近HK$2900一晚連早餐，雖然價錢已比倫敦或巴黎的酒店平一截，但相比東南亞國家的5星酒店，都算幾貴！究竟呢間酒店是否物有所值呢？ 酒店乾淨整潔，front desk靚女們熱情有禮，仲比我們提早上房，每人更有杯welcome drink，仲話可以帶我們行酒店一圈介紹一吓。靚女，我坐佐12個鐘飛機真係好累，好想上房洗個面义义電先呢！ 酒店內有不少藝術擺設，雖然我無咩藝術細胞，但都幫D藝術品影佐唔少相。   房間設計時尚且寬敞，房間隔音出色，完全唔會受到隔離鄰舍影響。King size大床十分舒適，我兩晚都熟睡且一覺瞓到大天光。义足電就自然可以玩得開心啦！   不得不提的是酒店早餐非常美味，部分選擇即叫即做，牛角飽鬆化可口，我索性放低減肥包袱，一於食埋先算！ 酒店更設有泳池和健身室，美中不足係房間浴室不設浴缸，不過我仍然會係Tripadvisor比足滿分！ 旅遊日期：2014年6月

根據2014年萬事達卡「世界旅行目的地指數」，倫敦成功取代了曼谷榮登榜首，成為全球最受歡迎的旅行目的地城市！ 我剛剛從呢個冠軍城市回來，已經急不及待計劃下次再遊的時間表，究竟倫敦有甚麼過人之處呢？我可以數10個原因比你： 1）治安良好 相比起歐洲其他受歡迎城市如巴黎、羅馬或米蘭，倫敦治安相當唔錯，錢和護照都唔駛左收右藏，自然玩得安心和開心。我們係倫敦餐廳吃飯，目睹唔少人將手袋放係位就行佐去洗手間，嘩！呢D行為係香港都唔得啦！ 2）交通方便 倫敦地鐵和巴士四通八達，一張Oyster卡（類似香港八達通）就可以帶你週遊倫敦，加上路線指示清楚，十分易明！巴士站上亦會顯示巴士預計到站時間。致勝之道就是贏在細微之處，香港應該參考吓啊！ 3）景點名勝多 未遊過倫敦的人都一定會認識大笨鐘、倫敦塔、倫敦眼、白金漢宮、西敏寺、大英博物館和泰晤士河等等著名景㸃，呢D打卡熱㸃，隨口都可以數6、7個，喜歡影相嘅朋友一定唔可以錯過！ 4）購物選擇多元化 巴黎和米蘭以賣名牌為主，而倫敦除了貴價貨外，亦有中價和廉價貨選擇！唔係講笑，48英磅可以係Primark揀到套時尚西裝，行Oxford Street嘅人，10個有8個都攞住袋Primark。如果你喜歡行百貨公司，倫敦亦唔會令你失望，除佐鼎鼎大名嘅Harrods外，仲有Selfridges、Liberty、Next和香港人熟悉的馬莎等。加上，倫敦店舖的營業時間亦較巴黎和米蘭長，起碼星期日仍然營業。正！ 5）公園任你行 係倫敦除佐多姿多采嘅行程外，你亦可選擇漫步海德公園、St. James Park、Green Park、Kensington Park或Regent Park等，咁大嘅公園係香港呢個彈丸之地絕對負擔唔起，記得大力吸多幾吓新鮮空氣先走呢！ 6）零語言障礙 在倫敦你不但睇得明，亦聽得明。毫無疑問，英國囗音對香港人來説是最容易聽入耳的。沒有語言障礙，對自由行的遊人來説就更方便，自然玩得更開心！ 7）週邊遊選擇多 除了倫敦外，由倫敦去英國其他城市如Oxford、Cambridge、Manchester、York、Leeds或Liverpool都十分方便，亦可以坐Eurosta