Work Heart Play Heart!

係日本浸溫泉就試得多，係台灣浸就第一次，初時還擔心台灣溫泉酒店的質素，試過後就明白自己有幾大鄉里！ 位於宜蘭的礁溪寒沐酒店（Mu Jiao Xi Hotel）於2017年11月初開業，設計時尚。帶著爸媽去旅行，我們揀了較大的房型（迎曦閣），一於等兩老嘆番吓！ 房間非常寬敞，且備有特大私人風呂，沐浴間及更衣地方，正！酒店還選用席夢思床褥，我們瞓得超舒服。 房間雪櫃內備有不少免費凍飲，一邊浸溫泉，一邊嘆凍飲，爽！呢度嘅溫泉無色無味，浸完第二朝起床發現皮膚滑了很多，連因乾燥又紅又甩皮的膝頭都好轉了不少，得！ 入住期間適逢酒店跟剛獲米其林二星的請客樓餐廳合作，我們當然不會錯過，試佐個4人晩餐。台幣3980的4人餐非常豐富，且碟碟高水準，兩老邊食邊讚！ 早餐是自助式，款式多到還以為自己食緊晚餐。以港幣2千多一晚連早餐的價錢，實在超值！ 另外，酒店備有室外溫度池及不少兒童設施，絕對適合一家大細嚟渡假！ 旅遊日期：2018年10月

沖繩嘅溫泉酒店選擇並不多，在無咩選擇下我們揀佐位於瀨長島的琉球溫泉瀨長島酒店(Ryukyu Onsen Senagajima Hotel)。農曆新年期間，酒店房間索價逾HK$4000一晚，仲要唔包晚餐。呢個價位，令我們對酒店充滿期望。 一到埗，我們的期望已瞬間轉為失望，酒店大堂勁細且裝修普通，跟剛剛check out 的Hyatt Regency Seragaki Island Okinawa 好大分別。 一開房門，真心想爆粗，我從未經歷HK$4000多一晩酒店係呢個質素！酒店房間不大，兩張床對開已經是放喼和休息地方，私人半露天風呂連接沐浴間，而廁所則在入囗的另一邊，細到無朋友！由於我們住3樓，私人風呂必須放一邊浴廉才安心，景觀cut 佐一半。值得一讚的係床褥舒服，我們瞓得很好！ 早餐設於大堂，選擇尚算豐富，但係都唔值呢個價！ 落雨加上扶老攜幼關係，我們兩日晩餐都係酒店解決。第一晚我們選擇類似懷石料理的set menu ，盛惠5800至8600Yen 一位，食物質素一般，沒有驚喜！ 第二晚㨂佐酒店推廣的All You Can Eat 火鍋（牛、豬、蟹任食），索價7000Yen一位，我們約7:15pm到場，7:30pm才開始食，7:50pm 想再加牛時，侍應同我們講話last order，唔係化，7000 Yen食半個鐘？我們入佐黑店嗎？經連番理論後，餐廳皇恩浩蕩咁比我們食到9pm！真係多謝晒！經仔細翻查酒店宣傳單張，發現單張下有魔鬼細節指All You Can Eat 火鍋供應至8pm，侍應應該一開始就同我地講清楚時限囉！呢D服務態度竟然發生係日本，汗！All You Can Eat 火鍋嘅質素普通，蟹唔夠鮮，牛和豬亦不算上等！ 唔知道我會否再遊沖繩，不過我好肯定唔會再揀呢間酒店！ 旅遊日期：2019年2月

在2018年8月下旬開業的Hyatt Regency Seragaki Island Okinawa 位於沖繩島西面的私人島嶼上，係Hyatt 集團的新成員。 酒店位於恩納區，由機場揸車去酒店，或由酒店自駕去水族館或八重岳賞櫻都是約一小時的車程。 新酒店設計時尚，戶戶向海，2月的沖繩乍暖還寒，我們最喜歡打開露台門吹吹海風，聽聽海浪彈奏，呼口新鮮空氣，爽！酒店設計環保，露台門一打開，冷氣隨即自動關上，怕熱的朋友可以開著吊扇，十分舒服。 房間寬敞舒適，隔聲做得相當唔錯。廁所和浴室分開，正！床榻軟硬適中，惟枕頭略軟。 早餐於大堂的餐廳，以西、日式為主，選擇豐富，味道不錯，惟兩天的款式沒有變化，食多幾日可能會悶呢！ 農曆年假期係度住佐兩晩，一晩房價連早餐盛惠約港幣二千元，房間如此高質素，尚算可接受吧！ 酒店內的意大利餐廳不論菜式及味道都相當唔錯，而且價錢唔貴，CP值高，值得一試！ 旅遊日期：2019年2月