8月東京之旅,我們於箱根湯本溫泉月之宿SARA住了兩晚,係度食足5餐,仲飲佐唔少酒,結論係超值! 上集提到酒店有酒任攞,食晚飯飲酒亦當然免費,一泊二食嘅晚餐已包了任飲優惠,有酒精及無酒精飲品任你揀,超開心呀! 呢度嘅晚餐以火鍋為主,邊爐精一定大滿足。第一晚我們選了和牛火鍋,除主菜外,當然唔少得日式頭盤及前菜等,正! 無論頭盤點精緻,都唔及和牛吸引,這個滿佈雪花的和牛,入口即溶,美味! 去旅行嘅胃口一定比平時好吧,呢個和牛份量一定唔夠喉,放心吧!牛及菜都可以encore 一次。 仲未夠飽?唔緊要,酒店每晚10:30有免費拉麵供應,食埋後,真係堅飽。 和牛後,第二晩我們選吃了海鮮火鍋,呢個餐附有刺身,同樣唔簡單! 不過火鍋用嘅海鮮雖然都新鮮好味,但較普通,若然你只係度住一晩,食和牛會開心啲呢! 一泊二食嘅package,當然唔少得早餐,酒店同樣安排了兩個唔同款式嘅早餐比我們,正! 第一日嘅早餐略為普通,可能我食慣西早,沒有咖啡、奶茶嘅早餐並不完美! 第二日嘅早餐竟然有火鍋,雖然只是煮菜,但對於一個邊爐精嚟講,總覺興奮。 雖然早餐時候,餐廳並沒有咖啡供應,但無啡不歡嘅人可到酒店大堂歎杯免費自助咖啡,义足電後再出發! 酒店距離箱根湯本駅只有約10-15分鐘路程,沿途經過溫泉街,極度方便。8月尾一泊二食價錢約三千多元,係既新且舒服嘅酒店又飲、又食、又浸,尚算合理喎! 旅遊日期:2016年8月