Work Heart Play Heart!

2013即將過去，今年到過唔少地方，影佐唔少相，未必每張相都有用嚟寫blog，在此回味一下一些特別但又無寫過嘅片段吧！ 差不多每年1月生日都去會情人 - 日本，過去從未遇過日本酒店會送來生日小驚喜，今年入住大阪難波站的Swissotel，房門一開已見他們送來的macaron 和賀卡，Surprised! 4月在台北見到這個橫額「貧者因書而富，富者因書而貴」，個人十分認同！是否因為此原因台北誠品如此受歡迎？你同意嗎？ 5月在高雄美麗島站遇上漂亮的玻璃彩繪，已謀殺了我不少時間影相。怎料7月在巴黎Sainte Chapelle又見到玻璃彩繪，每隻窗嘅玻璃彩繪都描繪著不同嘅聖經故事，手工極其細緻！今次唔單止影佐n張相，我逗留了好耐，遲遲都唔想走，美麗的玻璃彩繪再配合教堂內的吊燈靚極了！在玻璃彩繪包圍下，感覺好正！ 放眼看看這個世界，真的有不同發現。 7月人生第一次踏足法國，今次再唔係睇電視或明信片，係自己親歷其境，巴黎鐵塔同凡爾賽宮果真靚絕，聞名不如見面，雖然巴黎人嘅傲慢確實有點難頂，但嚟到巴黎眼球內全是靚人靚景，無計!靚仔靚女絕對可以繼續傲慢！7月初巴黎天氣相當好，天天風和日麗。是次浮遊巴黎是2013最精彩之旅！Paris, I must be back! 7月日本進行夏季減價例必一遊，到達登機閘口才知道被upgrade至商務客位！Wow! 聽講馬可孛羅會員係續會月份旅遊會有較高機會被upgrade的！結果我們是去程商務，回程premium economy！爽爆！ 9月在曼谷Siam Centre遇見Mr. P，被他簡單幾句昇華了！你同意嗎？ 10月結婚週年台北遊，竟然俾我發現這台灣品牌嘅面膜！L'HERBOFLORE蕾舒翠面膜只需10零蚊港幣，十分水潤，剪裁又夠大塊，超正！ 12月聖誕節墨爾本遊，我地25號早上7點多到達，Immigration Officer問我地會去邊度過聖誕節，我告訴他shopping，我諗住第一日坐完通宵機最好當然係hea吓，個靚仔Immigration Officer 話聖誕節大部分shop同食店都休息，有營業嘅食店會比正常貴！Sigh... 真係各處鄉村各處例，香港人面對呢種情況真係好難接

高雄嘅捷運站大多以地名或者附近嘅景點而命名，但美麗島站嘅背後卻隱藏著一段自由民主歷史。雖然我對歷史沒有多大興趣，但卻十分欣賞美麗島站內嘅「光之穹頂」，此為全世界最大單件玻璃藝術，並由國際知名藝術家水仙大師花了四年半時間才完成嘅傑作。 「光之穹頂」中間的兩根柱子，藍色代表陰，紅色代表陽，陰陽調合，成就了這個世界，而上方玻璃延伸出水、土、光、火四大主題，代表宇宙的誕生、成長、榮耀與毀滅，反映台灣人爭取自由民主的歷程。 個人認為如此美的玻璃藝術可能設在大型商場內更佳，除佐可以吸引商場人流外，更可同場增設藝術表演等，相得益彰！ 六合夜市就在美麗島站旁，逛夜市前可順道在站內拍照。 旅遊日期：2013年5月

廣男哥：「我KO佢，佢OK我！我再KO佢，佢仍然OK我！」其實我都KO過佢無限次，但佢仍然勁OK我！邊個? 我一開名，肯定大部分人即刻close blog。各位型男美女，希望比次機會我，繼續睇多1分鐘，感激！ 聖誕節係個普天同慶嘅日子！除佐可以整薑餅人外，仲有幾日假期吃喝玩樂，有無諗過誰是主角? 如果可以揀，我一定會揀好味嘅食物、舒適嘅地方。。。但佢竟然揀馬槽，傻的嗎? 信主前後最大分別係決志後我有真開心！真開心？喂！開心係無價架！信主前每當我玩到好開心，夜闌人靜後，我就會擔心如果我突然死佐我會去邊樹？係咪可以繼續happy呢？跟著我就會唔想瞓，因為怕會一睡不起！決志後，我再無呢個情況，因為我知道因著佢（耶穌）我會去天堂。聖經可信嗎？聖經係全球銷量最高嘅書，如果唔可信嘅話，我相信已經被推翻佐！有咩比知道將來嘅去向同開心重要！就算健健康康都係長命百歲，但依家係講緊將來1千年、1萬年同infinity！ 聖誕節會有不同嘅報佳音活動，因為想話比大家知耶穌嘅降生對人類歷史有多大嘅祝福！祝福大家聖誕快樂！ http://www.youtube.com/watch?v=cb82DKnWuPY&sns=em

好友Y小姐係Fanfares訂佐來回米蘭機票，最後一程玩完巴黎後，諗住坐Easy Jet飛返米蘭再飛香港，怎料黑仔遇著義大利罷工，Easy Jet航班突然飛唔到， 巴黎CX counter又未開始check in，無人問津！Y 小姐心急如焚，就算廿幾蚊一分鐘嘅長途電話都照打返香港問CX可否更改航班返香港。老友Fanfares唔可以改㗎！Y小姐氣憤地話，CX個職員一嘢就拒絕改期要求，老友再問可否買即日直航機票返香港， CX個職員回答：「要4萬幾蚊一張，你唔會買㗎啦！」 點算？此時此刻Y小姐心情跌到低㸃，係巴黎機場努力撲機票！最後用佐€1,300，即約15,000港幣買佐張Air France嘅機票，班機仲要唔係直航，要經莫斯科再到香港，最終要比原先計劃遲佐一日先返到香港，真係陰公豬！ 最慘係，攪完晒後先知道Easy Jet最後係resume佐班機，只係比原定時間遲佐一小時起飛，但Easy Jet無做任何廣播，唔係掛，真係離晒譜！ 其實Fanfares張機票只係比正常平少少，但係一D彈性都無，再加埋Easy Jet嘅離譜安排，真係嬲爆！ 法國及義大利罷工時有發生，安排行程時記得考慮埋呢點比多少少buffer自己啊！

食神戶牛是嚟神戶嘅其中一個主要原因，朋友話求其一間都好食，我們事前無做任何research，膽粗粗去到神戶先算！ 幸好嚟到神戶元町站有兩位旅遊大使主動前來協助，我們問她最近邊到食神戶牛好味，他們介紹了吉祥吉，見她們咁主動又nice，就信她們吧！ 由於我們到達時已經係下午2時多，所以唔駛等位，除鞋後他們帶我們走到2樓的座位！ 看看餐牌，wow! 原來食神戶牛都幾貴，我們㨂了套餐，有前菜、salad、牛排、甜㸃同咖啡，盛惠3500日元一set。起初都覺得有㸃肉痛，但套餐由前菜到牛排不但presentation精緻，味道亦非常好！神戶牛肉質細嫩，正！雖然略貴了一點，但十分值得！ 吉祥吉門外放了很多獎狀，旅遊大使確實無介紹錯啊！ JR元町站西囗步行約5分鐘。 旅遊日期：2012年7月

唔係第一次嚟101欣葉食藝軒，亦唔係第一次寫，寫完又寫係因為今次再有好嘢值得介紹！ 結婚週年紀念飛佐台北慶祝，訂佐101欣葉食藝軒享受2人世界！還記得上次一個月前訂位，都安排唔到𥦬邊位，今次距離食飯只得3星期，唯有係網上訂枱時特別注明結婚週年紀念，希望可以順利安排到窗旁位置，唔夠一日他們已confirm訂枱，且如願以償！哈哈！ 每人最低消費1,800台幣，我們order了此餐，連埋茶價，剛剛好！ 食物質素方便水準依然，我最喜歡這個魚翅佛跳牆，材料十足，淨係呢個湯都值回票價，正！ 雖然每樣餸菜都很精緻，但未食甜品已經好飽！ 好戲在後頭，他們突然送來小禮物説是慶祝我們結婚週年紀念，並用即影即有相機替我們拍照，當我們正在欣賞小禮物的時候，他們再送來賀卡，內附剛才所拍的即影即有相片，很有心思，很窩心！讚！ 如此特別的驚喜我們在香港從未經歷過，謝謝101欣葉食藝軒！ shinyeh.com.tw 旅遊日期：2013年10月

每次到日本，我必會盡情發揮強項shopping！今次嚟京都的其中一個主因是順路去滋賀outlet掃貨，所以特別揀佐一間超方便嘅酒店 - Hotel Granvia Kyoyo。 酒店房間比一般日本酒店大，且十分整潔。 酒店更提供免費wifi，Like爆！由於酒店在JR站上蓋，起初都有小小擔心嘈音問題，幸隔音設備做得好，完全沒有任何影響。惜 他們因房間爆滿，未能安排double bed給我們，扣少少分吧！   我們所訂嘅package並無包早餐，但酒店附近有很多食店選擇，唔駛怕無野食！ 酒店大堂 值得一提的是酒店附近有Yodobashi，玩具選擇多而齊！很多心水玩具去到梅田站旁的Yodobashi已賣光了！所以如果你也是日本玩具愛好者，記得嚟睇睇啊！     旅遊日期：2012年7月

旅遊人生快樂無比，如果臨行前才知道飛唔到，除佐失望到想喊外，仲要蝕埋旅費，真係比日日OT更難受！ 話說我趁著4日公眾假期飛名古屋旅行，機票confirm、酒店訂好、行程ready，Yen又換好，唔知係咪太興奮，臨飛前兩日竟然覺得天旋地轉，確診耳水不平衡！感冒都可以食藥照上機，耳水不平衡發作，醫生話起碼兩星期內唔可以坐飛機，此時此刻簡直心如刀割！ 已經無得玩，D錢可唔可以攞返呢？我立即call travel agent 叫佢幫我cancel機票同酒店，慶幸我的機票class可取消同退款，不過要比幾百蚊手續費！酒店呢？因為最少要3日前取消，所以無得退！當初諗住訂豪D，peak season3晚5星酒店差唔多9千蚊！旅遊保險cover嗎？我立即打去請教保險界好友，哈哈！原來可以claim 到！填佐claim form、寄埋醫生證明信、travel agent 賠償安排email同單據，約一個月後就收到錢，連CX嘅refund 手續費都可以攞返！Like! 我買佐邊間公司嘅旅遊保險？我向來支持出佐名服務好嘅本地綠色大銀行！

每次去台北都因為落雨而被迫放棄十分遊，今次天公做美，終於可以一嘗放天燈的心願，回味那些年！ 我們選擇了搭火車到十分，由台北車站到瑞芳站再轉平溪缐到十分車站，車程約需1小時15分鐘。由於平溪缐班次較疏，計埋等車，我們差不多用了1小時45分鐘才到達十分，仲要兩程車都無位坐，企到好累，真的有點後悔無坐的士！ 由於在端芳站要等半小時才有車到十分，我們去佐車站附近的美食街逛逛！ 平溪缐的列車較短，記得在瑞芳車站月台上睇清楚指示，揀啱上車位啊！ 平溪線沿途風景優美，難得郊遊，感覺興奮！ 到達十分車站了！Yeah! 落車後需要迅速行落路軌過對面月台！ 跟著人群從月台行出去便會見到很多小店！ 由於成街剋星（狗隻）關係，我極速走落路軌，開始準備放天燈！ 其實間間放天燈的價錢都一樣，我們揀了一間較多人的俾錢！一個彩色天燈250元台幣，仲有專人教你放同影相，十分抵玩！ 由於太多剋星關係，我不敢久留，放完天燈立刻鬆人！這個困擾我多年的問題，究竟如何克服啦 ?! 雖然路程遙遠，但總算感受過行路軌的滋味！在此祝各位月月旅遊、生活無憂同幸福快樂！ 出發前可先上網check吓火車班次呢！ www.railway.gov.tw/tw/ 旅遊日期：2013年10月