根據2014年萬事達卡「世界旅行目的地指數」,倫敦成功取代了曼谷榮登榜首,成為全球最受歡迎的旅行目的地城市!
我剛剛從呢個冠軍城市回來,已經急不及待計劃下次再遊的時間表,究竟倫敦有甚麼過人之處呢?我可以數10個原因比你:
1)治安良好
相比起歐洲其他受歡迎城市如巴黎、羅馬或米蘭,倫敦治安相當唔錯,錢和護照都唔駛左收右藏,自然玩得安心和開心。我們係倫敦餐廳吃飯,目睹唔少人將手袋放係位就行佐去洗手間,嘩!呢D行為係香港都唔得啦!
2)交通方便
倫敦地鐵和巴士四通八達,一張Oyster卡(類似香港八達通)就可以帶你週遊倫敦,加上路線指示清楚,十分易明!巴士站上亦會顯示巴士預計到站時間。致勝之道就是贏在細微之處,香港應該參考吓啊!
3)景點名勝多
未遊過倫敦的人都一定會認識大笨鐘、倫敦塔、倫敦眼、白金漢宮、西敏寺、大英博物館和泰晤士河等等著名景㸃,呢D打卡熱㸃,隨口都可以數6、7個,喜歡影相嘅朋友一定唔可以錯過!
4)購物選擇多元化
巴黎和米蘭以賣名牌為主,而倫敦除了貴價貨外,亦有中價和廉價貨選擇!唔係講笑,48英磅可以係Primark揀到套時尚西裝,行Oxford Street嘅人,10個有8個都攞住袋Primark。如果你喜歡行百貨公司,倫敦亦唔會令你失望,除佐鼎鼎大名嘅Harrods外,仲有Selfridges、Liberty、Next和香港人熟悉的馬莎等。加上,倫敦店舖的營業時間亦較巴黎和米蘭長,起碼星期日仍然營業。正!
5)公園任你行
係倫敦除佐多姿多采嘅行程外,你亦可選擇漫步海德公園、St. James Park、Green Park、Kensington Park或Regent Park等,咁大嘅公園係香港呢個彈丸之地絕對負擔唔起,記得大力吸多幾吓新鮮空氣先走呢!
6)零語言障礙
在倫敦你不但睇得明,亦聽得明。毫無疑問,英國囗音對香港人來説是最容易聽入耳的。沒有語言障礙,對自由行的遊人來説就更方便,自然玩得更開心!
7)週邊遊選擇多
除了倫敦外,由倫敦去英國其他城市如Oxford、Cambridge、Manchester、York、Leeds或Liverpool都十分方便,亦可以坐Eurostar去巴黎玩兩日,記得預先上網買火車票,早鳥永遠有著數!
8)食得招積
倫敦食肆選擇多,豐儉由人,你可以選擇係間Pub內平平地食一餐,亦可以選擇係特色餐廳食豪D。去到倫敦就當然唔少得嘆番個地道afternoon tea啦,此行我係倫敦食佐唔少美味食物,稍後會係此部落格逐一為大家分享!
9)免費wifi隨處有
Facebook打卡報行蹤、用whatsapp social,或upload靚相上Instagram 等已經成為香港人每日必做的事情之一。如果你唔想買sim card都唔駛愁,因為倫敦好多酒店、餐廳和商場都有提供免費wifi,你亦可於The Cloud登記,只需提供電郵地址就可以係好多The Cloud wifi熱㸃免費上網。Like!
10)航機班次多
國泰航空每日有5班機飛往倫敦,相比其他歐洲城市為多。此外,國泰航空亦於今年12月8日起增加航缐,直飛曼徹斯特(Manchester),到時可以係Manchester睇場足球比賽後,再落倫敦,爽!
我仲未數到歌劇已經夠10個原因了!倫敦確實五光十色,多姿多采,教我如何不愛他呢!
旅遊日期:2014年7月
留言
發佈留言