食在馬德里

民以食為天，西班牙在食方面可算是多選擇之地。相比巴塞隆拿，馬德里更是價廉物美，我們餐餐飽吃，減肥嘅事一於返香港先算！

於20世紀初落成的Mercado de San Miguel 係品嚐平、靚、正 Tapas 的天堂，仲有紅或白酒調製的水果雞尾酒Sangria，正！我們未夠2pm 嚟到Mercado de San Miguel，市場仍然超多人，雖大部分是立食，但仍然食得開心，飲得暢快！

出發前本打算試試馬德里的米芝蓮餐廳，但晚上用餐時間竟然是9:30pm 才開始，點等？最後，我們放棄了，只是在酒店附近揀了些高評價的餐廳晚餐，但仍充滿驚喜！

友人推介的La Barraca 以食西班牙炒飯出名，我們4人點了4個portion，再加了沙律同一碟小食。西班牙炒飯確實出色，唔太濕亦唔太乾。我們揀了兩款味道，一款是純海鮮，另一款是加了雞的，在味道上，我們食唔出兩者有何分別，但雞就煮得好「鞋」。對於4個香港人來説，4個portion 的份量實在多了一點，飽到不得了！無辦法，於點菜時，侍應堅持每人要叫1 portion，大概可能他們不明白分享的好處吧！

4人晚餐價錢

如果你係無肉不歡一族，一定會喜歡Parrilla El Gaucho 。餐廳分兩部份，近門口一部份似乎是吃快餐的，入面部份環境舒適且較有情調，由於我們已訂位，所以被安排坐入面，正！餐廳出名食燒扒，我們2人點了Argentina Grill，即係咩都有，2人份量，又係大盤到不得了。不過，味道確實出色，加個燒露筍，平衡一吓邪惡感！餐廳還免費送來兩杯餐前酒、小吃及甜品，我希望我嘅胃囗無因為呢餐變大了！🤣

2人晚餐價錢

遊完皇宮，記得一試位於皇宮附近的Cafe de Oriente。我們4人係度飽吃了一頓午餐，碟碟讚過不停。午餐25 Euro 包了4道菜，甜品仲要有驚喜，值👍🏻。

另外，我要推介Mercado de la Reina ，餐廳佈局跟 Parrilla El Gaucho相似 ，訂了位食晚餐的可被安排入面較寧靜和舒適的位置。我們點了Anniversary set ，包佐4個頭盤、每人1個主菜、1杯紅/白酒及甜品，餐價 33 Euro 一位，抵！呢度嘅頭盤味道相當出色，我們一啖不留，未上主菜已經飽佐8成，最終我們還是要放棄了半塊牛扒同大半碟薯條。本以為已經食唔落甜品，但由於甜品實在太好味，所以最後還是KO晒，今晚個胃又好忙碌了！

2人晚餐價錢

旅遊書介紹的Museo de Jamon，我們亦有去一試，相比係樓上介紹嘅餐廳，Museo de Jamon似乎較瞬息，呢度應該係特別為遊客而設吧！

跟香港不同，係西班牙點嘅火腿蜜瓜，個蜜瓜既不是綠色亦不是橙色，而是白色。人生第一次食白色蜜瓜，大鄉里！白色蜜瓜雖然水份豐富，但甜味欠奉，慶幸西班牙火腿唔鹹，呢個組合仍然相當美味！

跟巴黎一樣，係西班牙用膳絕對不能急，侍應會等你休息一會才遞上餐牌，再等你硏究一會才上前幫你點菜。就算你舉手示意，侍應們亦只會叫你等等！Well，入鄉隨俗，香港人係時候學習吓慢活了。🤣

旅遊日期：2018年4-5月