好食餐廳推介 @ 富良野

係富良野試了兩間較有名氣嘅餐廳， 分別係 KUMAGERA 及 MASAYA。前者一試難忘，我們一去再去。雖然MASAYA 嘅鐵板菜式味道不錯，但輸係環境，在大熱天氣下冷氣唔夠，抽風又有問題，點好食都扣晒分。

富良野和牛丼係KUMAGERA 嘅名菜，可能我們不太接受全生牛肉嘅關係，個人覺得一般。不過呢度有唔少好味食物，值得推介。

人生第一次試鹿肉，口感鬆軟，味道調較得剛好，我們一口接一口，很快便KO了！

第一次嚟嘅時候眼見附近嘅日本人10個有8個都係叫咖哩飯，我們第二次再嚟時一於試一試。呢度嘅咖哩十分香口，甜與辣嘅味道剛好，唔駛加咩餸，淨係咖哩汁撈飯已好好味，連平時唔多吃飯嘅我都食到停唔到口。

除了熱食外，呢度嘅魚生亦非常新鮮。呢個三文魚子丼，價錢只需2,000 Yen，三文魚子鮮甜無比，得！

第三次再嚟係食晚餐，一心希望可以試一試和牛火鍋。和牛火鍋一人前差不多係呢度最貴嘅菜式，但3,900 Yen嘅價錢包了一碟和牛、菜及烏冬，相比係香港呢個價錢一啲都唔貴。起初有啲擔心和牛切得比較厚，但我的擔心好明顯是多餘的。和牛非常軟身可口，肉味濃郁，正呀！

兩個人當然係叫兩份，我們還追加了一碟和牛呢！

Sake 蜜瓜係呢期推介，雖然我唔太愛Sake，但見1,000Yen 幾抵食就叫嚟試吓。加佐Sake 嘅蜜瓜依然鮮甜，酒味唔算濃烈，蜜瓜連Sake一齊食味道相當清新。

7月正值富良野旺季，KUMAGERA 不設訂位服務，繁忙時間嚟要排隊，不過個人覺得就算等都值得。

http://www.furano.ne.jp/kumagera/en/top.html

旅遊日期：2017年7月