墨爾本 - 藝術之都還是烏蠅之城？

大部分旅遊書都介紹墨爾本係充滿藝術氣息嘅地方，嚟到墨爾本係Yarra River旁除佐見到不少嘅藝術建設外，仲見到不同嘅街頭表演，有畫畫、唱歌、彈電子琴同結他，連扭波技術都特別厲害，藝術氣息確是十分濃厚！

惟旅遊書往往報喜不報憂，原來呢個藝術之都成街烏蠅！唔好誤會，墨爾本周圍都好乾淨，但點解會咁多烏蠅呢？我地問過local tour嘅導遊，一個話成個澳洲都一樣（印象中上次係Sydney都有呢個問題），主因係澳洲農業太多所致，另一個話因天氣變化太大所致！究竟誰是誰非還是兩個都錯呢，我並不知道，只知道D烏蠅真係超討厭！原來烏蠅同dirty未必一定劃上等號的！

我地12月25日到達墨爾本，本來諗住去商場睇下聖誕裝飾感受一下混合了藝術氣息嘅聖誕氣氛。怎料一落機靚仔入境職員嘅一席話已經將我呢個諗法完完全全破滅了，原來墨爾本大部分商店同食肆都會係聖誕節當日休息一天！Oh! 呢個資訊對於香港人嚟講真係無辦法明白的！

本來我都好擔心少佐一日會唔夠時間shopping，後來我知道我呢個擔心係多餘的！佢地所謂最大嘅商場Melbourne Central，相比香港任何一個主要mall都細！我地一個鐘唔駛行晒！Fine，慳返D！

12月墨爾本已踏入夏天，但早晚温差仍十分大，日間30幾度，夜晚可以跌到10度，而且會突然刮大風！

此時此刻真係覺得家在香港好幸福！

旅遊日期：2013年12月

留言

此網誌的熱門文章

中伏 @ Kani-shigure Namba Store

某日本通明星於關西旅遊節目揚言去大阪唔一定要食蟹道樂，並推介Kani- shigure。我們一於去試一試，睇吓是真還是假！我們shopping 到3pm 才上去食，入到餐廳見無乜人已有點懷疑，一開始食就確定中伏了！餐嘅價錢的而且確比蟹道樂平一㸃，但無論食物賣相、質素和味道都差一截，火！蟹棒刺身竟配三文魚，食到第二味已上火。你睇，個鍋竟然係爛的，呢度係日本嗎？慶幸個鍋嘅湯底尚算鮮甜。呢幾味嘅賣相同味道一致，超普通。。當侍應放低呢份野嘅時候，真係唔知做咩，想點呀？原來要自己動手做Risotto，講真食到呢度，已經勁失望，仲要自己動手？唔單止食物質素低，呢度嘅服務亦係0分，因為侍應永遠係黑面。幾千Yen一位嘅價錢食呢啲質素，仲要受氣，真係想喊！由於時間關係，此行唔可以再安排時間食蟹道樂！深深不忿嘅情況下，當晚立即係facebook同朋友仔分享，竟然有好多知音人，各位小心睇路！旅遊日期：2017年1月

德國必買及退稅

出發前還以為德國無咩好買，㸃知最後係要買多個Rimowa hand-carry喼先夠放戰利品，最終係半個喼去，3個喼返（1個28寸、1個26寸及1個21寸），仲未計手拿的3大袋手信，確實唔簡單！唔好諗住可以係德國買Hermes，法蘭克福嘅Hermes店，款式少到不得了，相比巴黎店，完全唔掂！唔知係咪我好彩，Chanel 法蘭克福店竟然係我們旅遊期間裝修！LV貨品算是最齊全，不論柏林、慕尼黑或法蘭克福都總有一間大LV係附近，LV迷絕對唔需要擔心！除佐呢D女士至愛外，究竟德國仲有咩好買呢？Birkenstock、Lloyds同Hugo Boss 呢3個德國牌子比香港平一大截，若係outlet買，價錢接近半價，我們買到儍佐！計埋退稅，呢個classic 款Rimowa 比香港平近HK$3,000。而呢款就平佐接近HK$1,300，無計依家歐元只係對8.4，淨係計滙率都夠抵！女士們買唔到Hermes 袋唔駛太失望，呢度買Swarovski 同 Pandora一樣比香港平！我係outlet 買Pandora，價錢係50%-70% off，137歐羅就有交易，仲可以退稅，正！係德國，買夠25歐羅已可退稅，基本上係Zara買件衫已可以，德國政府算是對遊客十分慷慨！可能太容易符合退稅要求，樣樣野都變相多個額外折扣，我們買得勁開心，而大部分店員亦唔會check我們passport，只係再印多張退稅單比我們自行填寫有關資料，非常方便！不過係機場攪退稅手續，就相比係意大利、巴黎同英國煩，首先要攞D行李去航空公司櫃台check in，若果行李內有退稅品，要等空姐係件行李整好條登機標籤後，再攞番D行李同單據去custom，海關會係單據上蓋印，跟住再去退稅櫃台，你可以選擇取回現金又或者退落信用卡，但取現金就要每張單收3歐羅手續費，嘩！咁當然揀信用卡啦！攪完晒退稅手續，就可以攞D寄倉行李去旁邊counter，他們會安排D行李登機，整個過程連排隊，我們差不多用了一小時呢！德國退稅額為8%至接近12%，視乎商舖而定，LV及Rimowa退稅額較高，而Zara則較低！提提你瑞士已不是歐聯國家，係瑞士買嘅野唔可以係歐元區退稅架！旅遊日期：2015年4月唔得閒去歐洲掃平貨？唔緊要，依家香港有很多代購服務，實行為各位以更低價錢買心愛產品，（容許少少廣告時間）誠意推介呢間由好朋友主理的歐

好味芝士火鍋 @ 蘇黎世

初次踏足瑞士，當然要試試地道芝士火鍋（Cheese Fondue），感受吓瑞士的傳統「芝」味！正所謂人生路不熟，上網看罷食評，已立即訂位，怎料全部爆滿，心想唔係掛，何解12月初的蘇黎世咁難搵食？我們唯有行 Plan B，實行早D去食！我們係尼達道夫街（Niederdorfstrass）行了一陣聖誕市場，便於黃昏6點零走進Swiss Chuchi 碰碰運氣。有禮女侍應開出7點半還枱條件，我們諗到唔諗一口應承！坐下時，個男侍應話我們今晚超幸運，因為佢地全晩爆滿！嘩！乜原來蘇黎世真係咁難搵食，感恩我們 Plan B 計劃成功！坐低一望差不多枱枱都食Fondue 同烤肉，我們決不執輸，照跟！同枱整餅高手話地道瑞士火鍋一般酒味太濃，香港人未必喜歡，於是我們落單時要求Fondue減酒，果然減酒後的芝士火鍋超級好味，芝士香濃且帶有少少酒香，得！連平時因怕肥而少吃芝士的我亦吃過不停，一於食埋先算！起初見到呢個烤肉拼盤平平無奇，心覺不妙，怎料三款肉類（包括牛肉、雞肉和豬肉）都味道出色，唔通無添加嘅歐洲豬、雞及牛真係份外好味？不得不推介這個烤芝士，侍應教我們先將整片芝士放入烤爐內烤至半溶，然後再放在微暖的薯仔上一齊食，呢個組合簡直係最好味嘅增肥拍檔！除了全枱高脂食物外，我們亦有order 沙津，當然相比起芝士火鍋、烤芝士薯仔同烤肉，個沙津味道相對普通了一㸃。最後我們還㸃了甜品，靚女侍應推介嘅呢個 Toblerone parfait 超得，朱古力味道恰到好處，不會太甜，我們很快就KO一整碟！埋單盛惠CHF112.5即HK$1,000唔駛連3杯紅酒，個人覺得好抵，話晒瑞士D野超貴呢！ Swiss Chuchi位於Hotel Adler內，鄰近跳蚤市場，十分易搵，值得一試！ www.swiss-chuchi.ch 旅遊日期：2014年12月

Work Heart Play Heart!

搜尋此網誌